കേരളീയ സമൂഹത്തിന്റെ നവോഥാനത്തില്‍ നമ്മുടെ ടീവി സീരിയലുകള്‍ വഹിക്കുന്ന പങ്കെന്ത് എന്ന ചോദ്യം ,ഒരു പങ്കുമില്ല എന്ന കൃത്യമായ ഉത്തരത്തിലേക്ക്‌ നമ്മെ നയിക്കുന്നു. പിന്നെ എന്തിന് കാണുന്നുവെന്ന് ചോദിച്ചാല്‍ വെറുതെ എന്നാവും ഉത്തരം. പക്ഷെ, നിരുപദ്രവമെന്ന് നമ്മള്‍ വിശ്വസിക്കുന്ന ഈ നേരംപോക്ക് പ്രേക്ഷകമനസ്സിലേക്ക്,പ്രത്യേകിച്ചും കുട്ടികളുടെ മനസ്സിലേക്ക് ഒളിച്ചുകടത്തുന്ന ആയുധങ്ങള്‍ ,അവയുടെ മൂര്‍ച്ച എത്രയുന്ടെന്നറിയുവാന്‍ നാം അധികമൊന്നും കാത്തിരിക്കേണ്ടിവരികയില്ല.കാരണം പുരോഗമന ആശയങ്ങളില്‍ നിന്ന് പിന്തിരിപ്പന്‍ മതാത്മക ആശയങ്ങളിലേക്കുള്ള കേരളീയ സമൂഹത്തിന്റെ പിന്മടക്കം അനേകം ഉദാഹരണങ്ങളില്‍ നിന്ന്,സംഭവങ്ങളില്‍ നിന്ന് മാധ്യമങ്ങളില്‍നിന്നു നാം തിരിച്ചറിയുകയും പ്രതികരിക്കാതിരിക്കുകയും ചെയ്യുന്നുണ്ട്. നിസ്സംഗത മലയാളിയുടെ മുഖമുദ്രയായി മാറിയിരിക്കുന്നു. ഇത്തരമൊരവസ്ഥയില്‍ ജാതി മത ധ്രുവീകരണത്തിന് ആക്കം കൂട്ടുക എന്ന ക്ഷുദ്രകര്‍മ്മമാണ് നമ്മുടെ സീരിയലുകള്‍ നിര്‍വഹിക്കുന്നത്. സ്ത്രീ വിരുദ്ധ ആശയങ്ങളുടെ സമ്മേളന ഇടങ്ങളാണ് സീരിയലുകള്‍. പരമ്പരാഗത സ്ത്രീ സംങല്‍പ്പങ്ങളുടെ വാര്‍പ്പുകള്‍. ചിന്തിയ്ക്കാന്‍ കഴിയാത്ത ,സംവദിക്കാന്‍ കഴിയാത്ത ,ചോദ്യങ്ങള്‍ ചോദിയ്ക്കാന്‍ കഴിയാത്ത ഒരു തലമുറയുടെ സൃഷ്ട്ടിയിലൂടെ മാത്രമെ കേരളത്തിലെ ഭാവിതലമുറയെ തങ്ങളുടെ ആലയില്‍ തളച്ചിടാന്‍ കഴിയൂ എന്ന് ജാതി മത ശക്തികള്‍ക്കറിയാം.അതിനുള്ള ഭൂമിക സീരിയലുകള്‍ ഒരുക്കിക്കൊടുതുകൊണ്ടിരിക്കുകയാണ്.
പോസ്റ്റുകള്‍
